中軟國際（354）係一家冇PE嘅企業，但實際業績靚爆鏡，要實。中軟係祖國知名IT企業，兼係阿爺「金」字號信息化服務主要供應商，來頭唔嘢少。2010年度（12月年結），中軟表面見紅4000萬銀（人民幣．下同），主要因為扣除優先股公平值及商譽減值等非業務性虧損1.75億銀，搞到總體盤數唔靚仔。若睇基礎業務溢利，實際翻咗一番到2.3億銀，靚爆鏡。再講，中軟有包括阿爺及內地大孖沙企業客戶網，加埋祖國IT市場繼續好景，有估計今年產值可達1960億銀，中軟繼續肥仔水。中軟2011年度核心業務溢利係咁意增20%到2.76億銀，實際PE7.2倍，平到爆。收集擺中線，現價1.91元，博翻半番到2.86元，中軟PE不過10倍。

深圳科技係現金牛

深圳科技（106）揸住淨現金高達9.8億銀，集團市值不過13.5億銀，淨現金幾乎等同本身市值八成，係超級現金牛。而集團業務清晰簡單，又有咁多銀彈，遲早等壯大。深圳科技最新每股NAV約0.90元，現價（0.68元）折讓近25%，仲有折讓水位炒。呢轉冷灶煲一煲，博深圳科技上到NAV，現價潛在回報率32%。
錢雋