亞視最近風頭咁勁,又拍騎呢三響炮,又榮登收視一點嘅大哥,無綫貴為大台,呢啖氣點啃得落先?哈!好在佢最近播啲劇集夠晒娛樂性,好唔好睇就見仁見智,但套套保證有穿崩位,間接令班觀眾更加落力搵錯處,操到個個金睛火眼,世事俾你哋看透啦!
繼《盛世仁傑》同《耀舞長安》連番出現穿崩之後,大前晚播出嘅《拳王》又有蝦碌場面。話說劇集講黃浩然飾演嘅畢弟開咗間帝國拳館,為咗隆重其事,特登call齊班記者嚟開記招,又擺晒甫士影相,幾咁架勢呀,點不知風光只係表面嚟咋!
其中一個鏡頭,就唔覺意影到兩位老臨喺跑步機度練跑嘅窘態。首先佢哋着住嘅白色「阿伯背心」已經非常搶眼,加埋佢哋嘅騎呢跑姿,寧舍覺得異相。