當年今日
關於我們

【如果感情只有四個月】談善言要做未做過的事 林耀聲去足咁多日旅行

蘋果日報 2018/12/11 00:00

林耀聲陳子豐談善言

談善言、陳子豐同林耀聲合作拍ViuTV新劇《假若愛有限期》,一套以未來2060年嘅愛情故事,呢個未來世界,有個時間法例,規定所有關係,包括每對情侶,由拍拖的第一日,已設定有時限,每段關係只可以維持四個月,之後就規定會分手、結婚就可以維持兩年。因為大家都預計到分手嘅一天,所以人同人之間相處變得關係疏離。談善言指現實中若果愛有時限,佢會選擇同另一半做一件從未做過嘅事,令自己可以牢牢記住。
劇中談善言同陳子豐本是一對,他們拍拖初期仲未有呢個時間法例,到世界被設定有時間規範,佢哋要走法律罅拍拖,但兩個之間發生咗啲事,令談善言想分開,而這個時候遇上咗林耀聲。三角關係糾纏,談善言搵嚟林耀聲慰藉:「咁多年我同陳子豐都一齊,中間有事發生,沉重得我好想走,但想分開也分開唔到,我做咗啲令大家都咁辛苦嘅事,就尋求慰藉搵咗阿聲,做我嘅傷口膠布,幫我止血,我真心鍾意佢兩個,但我有自己原因,有自私位唔想諗以前嘅野,想有新嘅生活。」
男女男湊在一起成嬲字,互相之間產生唔少妒忌、爭吵,兩個男人見到情敵,爆出超濃火藥味,林耀聲表示:「我同陳子豐同場嘅地方都係俾佢打,見親都俾佢打,完全無文戲。」陳子豐喺劇中飾演警察,所以每次見林耀聲便會拉對方返差館,為求阻止佢同談善言嘅相處時間:「我哋每次見面都打,最多都係得兩句文戲。」而拍攝時都會有唔少危險動作,林耀聲話佢哋有一場戲喺天台追逐打鬥,都幾危險:「有場戲喺工廠區天台拍,因為嗰度天台,行後少少就跌落樓,所以拍時有吊威吔,驚我哋掉下去。拍嗰日落雨,又有青苔,好多水漬,都真係危險。好彩我哋有武指指導,同埋有替身,如果唔係變遺作。」
陳子豐指這個劇中嘅世界有時間限制,整個世界觀好吸引,每件事有限制睇到好多唔同種嘅人性:「我拍嘅時候代入去諗,每個關係有時限,開頭會覺得好爽,因為唔使建立好深厚關係,唔需要好多感情,唔需要對佢好好,唔使特登保鮮,但諗深一層,個個都係咁既話,朋友都冇個,會係好慘嘅事。」現實中佢同太太拍拖十年後結婚,為求感情保鮮,特別節日會製造驚喜給太太,假裝要開工,但一早回家準備晚餐o氹太太。
現實中談善言唔鍾意別人控制自己,包括感情都唔想人哋控制時間長短,若遇到一生最愛嘅人但有時間限制,佢想喺速食嘅世界裏,同對方做一樣從未做過嘅事,令自己好好記住:「人生咁長好多嘢唔知有乜冇試過,但想有啲未做過嘅嘢同佢做,因為未試過嘅嘢會記得最深,你問我噚日食過乜我未必記得,但人生去到o依家廿幾歲,最深刻係乜我未必知,所以盡量想記得嘅,就係第一次做嘅嘢。」
林耀聲就覺得如果限時只係得四個月相處,佢想同情人好好地守在一起:「我會去足四個月旅行,周圍去,想見識一啲唔同樣,同埋只係同佢一齊,想每日都見到佢,嗰四個月瞓喺側邊都係佢。」把握每分每秒,陳子豐更想每天一起待在家中:「我會選擇喺屋內日對夜對,廿四小時唔出街都對住佢,只得四個月喎,要一齊生活,夾硬搵嘢做不如一齊生活,先會更易了解對方,若第一個月已經頂唔順,四個月就算耐了﹗愛一個人未必相處到,贊成同居先結婚。」
採訪:王連連
empty
談善言、陳子豐同林耀聲合作拍ViuTV新劇《假若愛有限期》
empty
現實中陳子豐同太太拍拖十年後結婚,為求感情保鮮,特別節日會製造驚喜給太太
empty
男女男湊在一起成嬲字,互相之間產生唔少妒忌
empty
林耀聲就覺得如果限時只係得四個月相處,佢想同情人好好地守在一起
empty
現實中談善言唔鍾意別人控制自己,包括感情都唔想人哋控制時間長短
empty
陳子豐指這個劇中嘅世界有時間限制,整個世界觀好吸引