當年今日
關於我們

【韓劇讀】《奇皇后》集集追:皇帝唔想再見承娘王裕慘被殺

蘋果日報 2014/04/08 06:00


《奇皇后》噚晚播到第44集,收視有24.3%,同檔李寶英主演嘅《神的禮物─14天》收視有9.4%,韓智慧主演嘅《陽光滿溢》就跌至新低,僅得2.2%。


《奇皇后》噚晚劇情講到高麗國國王王裕(朱鎮模飾)被誤會係令到元朝多次打仗戰敗嘅罪魁禍首,王裕被皇帝捉拿問罪,皇帝因為被太后、丞相伯顏(金英浩飾)設計,令佢以為奇承娘(河知雲飾)同王裕關係密切,所以當王裕被捉拿下,皇帝未摸清來龍去脈就想行私刑斬殺王裕,後得承娘同太后制止。太后同丞相合謀,希望迫令王裕承認承娘都係同謀。

不過王裕勢死都唔肯講出承娘嘅名,而承娘亦想盡方法去救王裕,並要其他大臣都協助自己,並向其他大臣講出當今太子摩訶非皇帝親生,眾大臣亦答應協助承娘。但皇帝因妒忌承娘偏幫王裕,即使承娘解釋因為想鞏固兒子愛猷識理達臘嘅地位,怕兒子因為有高麗血統而不被接受,但係皇帝聽唔入耳,仲覺得承娘從來冇信過自己,皇帝大感失望兼痛苦。

王裕同佢嘅臣子被下令當眾處斬,幸承娘及時趕到,並安排證人金順祖嚟澄清王裕冇犯罪,但皇帝方面仍將王裕流放,但伯顏唔想放過王裕,半路安排同王裕對決,等王裕死都有尊嚴,但前丞相嘅兒子唐其勢(金正鉉飾)派人趕到想一次過殺死王裕同伯顏,王裕被伯顏刀刺傷,伯顏就被箭射中,兩人生命都危在旦夕....

皇帝對承娘又愛又恨,原本向承娘承諾戒酒,但因為對承娘感到失望,又再故態復萌,日日借酒澆愁,更下旨話唔想再見承娘,令承娘大感痛心,當承娘從伯顏侄兒脫脫(真理翰飾)口中得知王裕已經死咗時,難以置信嘅承娘傷心欲絕。