跑馬地景祥大樓天台，面積約5,000方呎，現於市場放售叫價380萬元，呎價760元。然而近400萬買個天台，究竟可以做乜？代理話：「博收購囉！」

事實上，景祥大樓樓齡49年，距離舊樓50年樓齡收購門檻降至八成，僅差1年時間。據悉，一名投資者近年已密密收購呢幢舊樓的單位。根據地契，全幢大廈業權分開149份業權，呢5,000呎天台佔149份之1，聽落好似好少，但查實整幢物業合共138個單位、9個地舖、1個閣樓及1個天台，平均分佔149份業權，者係1個單位都是佔149份之1業權，1個天台相當於1個單位業權。

翻查資料，今年6月至8月，景祥大樓錄4宗成交，實用面積由372方呎至570方呎，成交價由454萬元至612萬元，呎價由10,737元至12,204元。如果以純博收購的角度，即用低市價16%去博。

除了博收購，大廈契容許天台掛置廣告牌，都是一個賣點之一。至於話想用來住？天台僭建係犯法，唔可以用來住，除非玩灰色地帶，好似早前有人在天台搭帳篷瞓覺咁啦。

就算你肯博，想向銀行借按揭都好困難。中原按揭經紀董事總經理王美鳳表示，部份銀行會就天台進行估價，而且仲估足價，不過估足價又代表會借足按揭，就算物業已成功分契，用途亦清楚界定，但由於物業流通性低、承受風險重，銀行一般都不承造按揭，就算有，成數都可能會好低。

記者：陳家雄、程俊華

掌握財經生活資訊，即Like「蘋果ATM」fb專頁啦！
http://fb.com/appledailyatm