【Second Life】大銀行徵2%轉數費用 摙死虛銀（杜夫人）
蘋果日報 2020/06/07 00:00
電子錢包虛擬銀行
有傳大行計劃向虛擬銀行及電子錢包收取介乎1.5%至2%手續費。
路邊消息指，大行計劃向虛擬銀行及電子錢包就電子直接扣賬授權（eDDA）服務收取介乎1.5%至2%嘅手續費，貴唔貴見仁見智，咁做法同摙死虛銀無大分別。
虛銀界流傳，有大行擬向虛銀及電子錢包徵收介乎1.5%至2%的eDDA手續費。傳統銀行按經營成本、風險計算向收賬行徵收費用，過河濕腳，人之常情，不過收2%，仲無設上限，似乎又真係辣咗些少。夫人幾位銀行界友好及VB朋友都一致認為收費唔合理。
點解唔合理？舉例，如果夫人每月轉100萬落虛銀賬戶咁計，大行就會每次向虛銀收2萬蚊手續費，一年落嚟，咪24萬元，又如果多幾十位夫人一齊轉錢，呢筆數真係好可觀。
可以想像，大行同新晉鬥法，虛銀抗爭條件實在有限。搵金管局出頭？喺自由經濟大前提下，金管局干預機會甚微，似乎只能硬食。
夫人純粹覺得有趣，當大行每次收到eDDA指示，並一律向虛銀收取2%費用，再使出一招Rebate吸錢回巢，咁樣Loop法，等同零成本「錢生錢」，隨時可以Loop到增加派息，同時又可以挽留資金，穩住CASA，真係一石二鳥㗎。
消費者一樣有著數，不嬲都話「離開是為了再回來」，唔係愛情，係講資金，如果大行肯畀1% Rebate吸返舊客戶啲資金返去，夫人梗係仿效TNG咁每日轉幾轉，郁一郁又有錢執喎。
江湖傳聞銀行公會相關委員會已經將呢件事擺咗上枱傾，唔知最終件事會發展成點呢？
杜夫人
-----------------------------
-----------------------------