有人無工做，或者有工無人做嘅情況經常都會出現，英超球隊史雲斯家陣就正正係咁嘅情況。

史雲斯之前炒咗基文迪，前曼聯助教傑斯因為吼住威爾斯代表隊份工，已經講到明話無興趣，朗奴高文都唔心郁；普利斯嘅機會都唔高，不過就係史雲斯對佢無興趣。就連依家做緊史雲斯看守領隊、仲未退休嘅中場里安比頓都耍手拎頭，話咪旨意佢長做呢個位。

英國《天空體育》報道，今季較早時候俾水晶宮炒魷嘅法蘭迪保亞係天鵝新帥熱門人選之一，但係史雲斯仲考慮緊其他人選。今年47歲嘅法蘭迪保亞原本同水晶宮簽咗三年合約，但佢喺上任十星期、球隊喺英超開季四連敗兼入唔到波後就畀人兜咗。報道話前韋斯咸領隊比歷都有興趣，但係史雲斯就無call過佢。

--------------------<br />狂賀！BFB系列推出5周年，精彩活動為您安排，立即登入速享專屬優惠！ http://bit.ly/2xrTKGM 

天鵝諗緊法蘭迪保亞 仲有邊個有機會？