何家公子猷啟生得夠高大、外表幾俊秀，甚有爸爸賭王嘅影子，被封為城中筍盤，成個package嚟睇又真係唔錯嘅，猷啟回應《蘋果》亦都好謙虛：「唔係唔係，唔會為呢類標籤特別開心，仍須努力，尤其喺事業方面，呢刻絕對唔係筍盤，未夠班。」

講到單身，猷啟爆揀女友首要條件：「心地好，拍拖講感覺，自己唔心急，呢個moment想focus喺事業，要努力。」佢又話屋企冇催佢追女仔，被記者笑佢奄尖，佢解釋：「你哋成日講，我就媾唔到女朋友。」

問到家姐超雲同超蓮都咁靚，一屋靚女，會唔會揀女友都要求係靚女，佢講：「唔使，睇內在，合眼緣好緊要，如果真係有女朋友，我係會公開，自己唔會設定幾時要拍拖、結婚，要自己事業有成，自己搵到錢，經濟support到自己，同將來family，唔係靠屋企。」

咁超蓮身邊都好多女友人，乜冇介紹畀你咩，佢就話：「佢(超蓮)有安排我同佢嘅朋友一齊玩，但唔係話刻意介紹拍拖，佢啲朋友維持做朋友關係會好啲。」