【今日ENT】杜汶澤話題冇底線 Sexy Baby輕鬆招架
杜汶澤哩騷今日ENT
杜汶澤迎合潮流搞網台,佢仲羅致一班胸懷大志嘅靚女齊齊放笑彈,談情說性冇底線,佢直播節目《杜汶澤喱騷》明晚首播,今晚佢帶埋新女、23歲貝依霖先嚟到《蘋果》娛樂節目《今日ENT》吹水,分享吓佢哋做節目嘅趣事。
阿澤早前預告節目網上播放,尺度較大膽,話題更有講到性,阿澤話:「性真係好難handle,所有問題根源都同性有關,男人工作動力為性,令人有上進心,亦嚟自荷爾蒙。」
阿澤同貝依霖互動妙問妙答,貝依霖經常喺Instagram貼性感相,問阿澤有冇睇過,阿澤即答:「有,六格啲相爭啲冇着衫,有側波睇。」阿澤大呻做人辛苦,所以工作環境要望下靚女:「請啲靚女做嘢,個個Sexy Baby。」佢話老婆田蕊妮有信心,冇乜嘢忠告,至於做「澤女郎」要有乜條件?阿澤話:「唔好講到好似王晶,一大班女圍住我冇個識。」阿澤對爆乳貝依霖讚不絕口:「佢好相與,人最怕係拘謹,你睇鹹片都最憎啲女唔嗌。」醒目貝依霖搭嘴:「佢話鍾意我有反應。」阿澤續話:「鹹片最無癮男主角冇反應,唔知食幾斤偉哥,導演都掟劇本。」
阿澤代問貝依霖擇偶條件?貝依霖原來鍾情韓國oppa,不過自爆泳池媾過德國男,貝依霖快答:「我知你會話我港女食洋腸。」阿澤即追問:「德國出名肉腸,佢有冇請你食?飲酒梗係要有啲嘢送酒,有啲腸係長到卷住成餅。」阿澤機關槍盤問,貝依霖輕輕鬆鬆笑住招架:「我唔知有成餅嘅。」果然反應好快。
貝依霖有條件進軍影壇,佢話劇情需要唔介意性感戲,但到底幾錢先肯三點盡露?貝依霖猛叫阿澤開價,佢以監製新份估價:「80萬,其實都係高,出名AV女優講緊真做都可能30、40萬。」貝依霖話:「哎吔,全世界睇晒,80萬都唔得。」阿澤一句KO:「未必賣晒全世界。」兩人chit chat,阿澤口不擇言,盡顯真我性情。
採訪:陳杰、吉吉
攝錄:馮嘉文、卓振輝、陳慧安
化妝:Anita Lo
阿澤話請人梗係請靚女,個個都係Sexy Baby,包括佢身邊呢位貝依霖。