主演韓劇《浪漫滿屋》嘅韓國人氣型男Rain下月三號至五號會嚟香港宣傳唱片，聽聞近日向佢所屬嘅環球唱片提出想約佢做訪問嘅中、港、台、日、韓各地嘅報紙、雜誌同電子傳媒，合共高達六十個單位，都咪話唔犀利！
Rain今趟嚟香港時至少一行十六人，包括八個舞蹈員、兩個形象顧問、保鑣、經理人、髮型師同化妝師等，但就未定住邊間酒店，但Rain特別鍾情家鄉韓菜，所以環球亦會盡量安排佢歎韓餐，預計三日宣傳連住宿、機票同開記者會，花費都要幾百萬埋單。

亮相《勁歌金曲》

至於行程方面，無綫就成功搶飲頭啖湯，Rain來港第一日就會亮相《勁歌金曲》，環球想安排同公司嘅李克勤同場演出，但克勤嗰日要拍廣告，所以重未有定案。翌日下晝Rain就會喺下榻嘅酒店開記者會，同晚七至八點就喺荃灣愉景新城公開獻唱，到時韓、日、星三地fans都會拉隊來港打氣，估計嗰日嘅保安人數會超過半百。
由於韓風勁吹，唔少超級品牌都打Rain主意，希望佢來港時順便做宣傳，就連作風低調嘅英國潮爆時裝品牌VivienneWestwood都斟緊同佢合作，另外又有電訊、飲品同時裝多個品牌想請佢做代言人，有製作商重想請佢喺年尾開演唱會，Rain嘅搶手程度確係驚人。