溫碧霞（Irene）噚晚去到九龍灣，為後日舉行嘅演唱會進行綵排練歌，Irene話已經準備得好好，佢話：「呢段時間花咗好多時間喺演唱會上面，最近瘦晒身，本來有啲緊嘅衫，而家都鬆鬆哋。」問到怕唔怕啲衫太鬆會跌落嚟呀？Irene就話啲衫好靚，係特別配合演唱會個台同啲歌做嘅，總共會有5套，問到使唔使畀老公先過目？佢就話：「冇，希望俾佢surprise，到時老公同仔都一定會嚟。」

問Irene老公點樣支持佢？佢話：「真係要好好多謝佢咁多年嚟，無論開唔開心，喺工作上都畀好多支持我。」咁到時係咪會憑歌寄意送番啲歌畀老公？佢就話：「會呀，廣東歌國語歌都會有，到時希望畀個surprise佢。其實o依家練歌我都會飲少少酒，係之前出唱片嘅時候有監製教過我，飲少少酒，唱歌會relax啲，我出台前都諗住會飲少少，等自己輕鬆吓、有啲feel，可以放鬆啲。」

提到父親節，Irene透露呢兩日都要放鬆自己，一定會陪老公，問佢送咩禮物畀老公？Irnen冧爆話：「我送我畀佢。」至於個仔呢？佢就話未知道，不過個仔好鍾意花好多心思，會自己畫畫寫字。問阿仔會唔會上台？Irene話：「唔會啦，不過佢好鍾意唱歌，好有表演慾，有少少係我嘅遺傳，因為平時我都好鍾意聽歌，所以佢都好鍾意音樂同埋畫畫。」至於阿嬌鍾欣潼任演唱會嘅嘉賓，Irene話：「大家識咗好耐，同佢好夾，睇見佢就好似望見我自己咁，我覺得佢好單純，喺工作上都好欣賞佢，覺得佢係一個好好女仔。」另外，Irene亦都透露有其他嘉賓，到時會俾驚喜大家。

精選娛聞，喺晒《娛果》
http://fb.com/appledailyent