一連兩晚嘅吳浩康(Deep)《Listen To Deep Live 2017》，噚晚喺九展舉行尾場，獲陳柏宇同太太符曉薇、黃偉文嚟捧場，女友Michelle繼續喺台下支持。延續前晚全場爆滿嘅情況，噚晚依然座無虛席。

講番Deep嘅表演，首場可能因為緊張有唔少歌唱錯歌詞，尾場Deep嘅表現亦穩定好多，並喺台上多謝爸爸同緬懷去世嘅媽咪，但就無好似首場咁，再喺台上多謝女友，全晚總共四度激動落淚。Encore環節以佢嘅成名作《洗剪吹》及《先入為主》作結，臨走前仲向觀眾表示：「多謝你哋不離不棄，我哋紅館見。」演唱會喺十一點半完結，唔少觀眾依然反應熱烈唔肯離開，即使場館開晒燈仍不斷留喺台邊大叫Encore，終於Deep再次現身第二度Encore，再演繹多首金曲，觀眾才收貨離開。

Deep受訪時表示整個演出自己既感動又開心，講到尾場喊嘅次數少咗，佢話：「係叻咗，噚日喊到手都震埋。」仲話其實喺台上仲好想多謝歷年來幫過佢嘅助手同經理人，但怕講漏所以冇逐一多謝。

Deep又話星期一晚會繼續喺facebook上面開Live唱歌，佢話 ：「我開咗facebook live一週年，聽日又係一個全新開始。」係咪計劃下一步上紅館？佢話：「我當然希望越快越好，但我相信公司會去傾去安排。」

Deep又表示公司對佢好好，一直不離不棄，尤其日前發生替人訂飛被「走數」事件，佢話：「事發後Mani(霍汶希) 即刻同我講唔使擔心，專心做好演出，其他嘢佢哋會處理。」又話有好多朋友都主動伸出援手，本來係一件擔心事變咗窩心事：「我覺得自己今次處理不當，有一部分係激氣自己，又要大家擔心，自己唔識處理呢啲嘢下次都係唔好再自己搞。」

更多娛聞，喺晒《娛果》
http://fb.com/appledailyent