當年今日
關於我們

【三個夠晒數】陳茵媺出山拍廣告:努力keep fit 準備復出

蘋果日報 2018/05/02 14:11

陳茵媺廣告封肚三個夠晒數

三年抱三嘅陳茵媺(Aimee),生完囡囡Camilla後,一直都係專心相夫教子,做咗陳豪嘅賢內助,只係間中出席吓活動,搵下快錢。最近Aimee就為一個有機嬰幼兒食品,拍攝全新一輯廣告,以牛仔造型上陣,同幾位小演員去郊外田園取景。已經有3個小朋友嘅Aimee,更話湊三個小朋友好辛苦,正式宣佈封肚。
今次同啲小演員合作,Aimee坦言,好鍾意同小朋友開工,問佢會唔會希望同自己嘅仔女合作?佢即耍手擰頭話:「我會集中唔到啊!」但Aimee就話其實真係有廣告商想佢同仔女合作拍廣告,但全部都俾佢推咗,佢話:「佢哋年紀仲細,一來唔想佢哋太多曝光,二來我覺得佢哋應該以讀書為先,先培養讀書心態,好似我以前咁,我都好喜歡拍嘢,但Daddy唔想我心散,要我大學畢業先,之後先可以選擇自己想做嘅嘢。」
講到咁鍾意小朋友,問Aimee會唔會再追BB?佢就斬釘截鐵話短期內未有呢個打算,揚言暫時三個夠數:「湊三個小朋友好辛苦,因為我同阿Mo(陳豪)好多嘢都是親力親為,而且我想做番幕前工作,自從上次拍電影後,已經努力keep fit,回復狀態,ready復出。曾有報道話阿Mo唔想我復出幕前,當然唔係事實,佢知我好鍾意拍嘢,佢好支持我,如果我要拍嘢,佢會負責湊小朋友,調番轉到佢拍嘢,就由我湊小朋友,我哋係partnership。」
精選娛聞,喺晒《娛果》
http://fb.com/appledailyent