歐陽偉豪（Ben Sir）同林盛斌（阿Bob）今晚喺九龍灣為《髒言鬥厲歌舞劇PartII》比賽擔任評判，佢哋話呢個比賽係推廣本地貼地嘅文化，內容會有少少粗口。

阿Bob就話粗口其實無得避忌，日日都會有機會聽到：「少少粗口其實無傷大雅，當然喺屋企講粗口係零，呢10年，屋企啲女都無聽過我講粗口。我個女有時上網聽外國啲歌，啲Rap有粗口，佢都體會我講『爸爸咁我唔聽啦』。」

Ben Sir就話將粗口娛樂化、表演化，將粗口提昇其實好好，仲笑言特登寫件「個門字入面有晒咁多個字」嘅Tee黎撐場。佢話：「平時唔會捉到我講粗口，都係一個討論啫，反而喺屋企，有時好忟，自己都會講一個字，但我係針對件事或者自己。」

另外，阿Bob囝囝日前發燒入院，佢話因為太太去咗杭州公幹：「好彩婆婆仗義幫忙，同埋真係好感謝醫護人員好好、好細心，我都深深感受到媽媽喺屋企真係好重要。」

精選娛聞，喺晒《娛果》 http://fb.com/appledailyent