港股昨日都幾悶，成交只得564億，恒指跌89點，全日波幅唔夠140點，股民唔係好敢入市，並唔係因為前晚花旗股市下跌，而係驚人行加息。
人好奇怪，政府做嘢可能冇刻意安排一種規律，但人就會因應經驗砌條公式出嚟，人行次次都係吼住假期宣佈消息，搞到𠵱家逢放假同周末啲人都驚驚哋，下禮拜四係佛誕假期，股民又要驚多日。規律呢樣嘢好多時嘅作用都係正面嘅，但如果規律變成製造不明朗嘅工具，咁樣就唔多好嘞，唔知人行會唔會改變吓𠵱家呢種不成文嘅規律呢？
QDII改變咗，禮拜一個市癲咗，好多人賺錢，跟住好多人唔識走貨，仲有人追入，結果係成手蟹貨。AH股差價係咪會收窄，仲有好多變數，唔係表面睇咁簡單。俊樺呢個禮拜問咗好多人，如果你係國內嘅同胞，正喺度癲炒A股，會唔會因為放寬咗QDII就嚟香港買H股？答案全部一樣，係「唔會」，原因都係一樣，A股咁好炒，咁癲，點會走嚟炒H股？A股同H股某個角度係同一樣嘢，但兩個市場唔同，炒法都唔一樣，又點會炒生唔炒熟，捨近圖遠？咁唔係話冇人落嚟炒H股，只係話大家諗呢樣嘢嘅時候唔好過份樂觀。

網通C輪9845：網通（906）有大行唱好，即刻醒神，昨日唔理個市跌，一於繼續炒，收市報19.98元，跟住會試20.80元，破位睇22元，可以買番啲網通C輪9845。
9845昨收25.5仙，槓桿率7.8倍（有效4.4倍），對沖值0.56，正股升上20.80元同22元，9845應該喺30仙同37仙樓上，正股跌穿19元止蝕。