娛樂圈多馬年BB出世，財經界都唔弱，創興銀行（1111）副主席兼董事總經理梁高美懿與前經濟發展及勞工局局長葉澍堃就快抱孫，分別榮升外婆同埋爺爺，仲要兩位都係抱男孫，孫仔4、5月出世，恭喜晒。
咁啱得咁橋，梁高與葉澍堃分別喺2012年底嫁女同埋娶新抱，今年就齊齊抱孫。葉澍堃長子葉瀚林（Hiram）係美資投資銀行賓架，太太Connie嘅預產期喺5月初。
Hiram話，已經準備好晒所有BB用品，早前專登買本《辭海》，諗住喺裏面揀字改名，但實在太博大精深，最終決定都係交畀爺爺，即係葉澍堃幫孫仔改中文名，英文名就自己諗。

梁高喜事多　四代同堂

至於梁高，踏入馬年真係喜事重重，不久前被越秀集團高價邀請，出山坐鎮創銀，下月又榮升做靚靚外婆，跟媽咪同愛女等，可以組成四代同堂。
梁太細女Angela，前年底出閣，嫁畀同屬金融界嘅才俊Ronald，婚宴分別假四季酒店及馬會，筵開數十席，二人如今開花結果，正全天候準備，迎接BB降臨。
梁太收到恭賀電話，即刻笑呵呵咁話，Angela預產期喺下個月，不過𠵱家「anytime都要準備好」。關於BB性別，佢話乖孫「應該係個百厭仔」，咁即喺寶貝女一索得男。
首度榮升外婆，梁太話唔使講，梗係好開心雀躍啦，孫仔孫女都咁歡喜，之不過，佢相信自己仲要些少時間適應，第日有小朋友叫自己做「婆婆」呢個稱呼。
咁有冇媽咪心得可以傳授畀愛女呢？梁太就話，阿女雖然即將為人母，但仍然紮紮跳好有活力，成日出街，自己只能夠經常囉嗦叮囑，叫阿女出街要搵人陪住。呢位準外婆希望孫仔出世，母子平安，健健康康，快高長大。

李華華
mailto:[email protected]