【新增動新聞】
香港人呢排喺國外出醜不斷，昨日就有人喺日本地震災區北海道，因未獲安排入住，即場「發爛渣」大鬧酒店 。今次就有由紐西蘭網民影到，一個操流利廣東話嘅華人喺當地食完煙之後，隨手丟煙頭落地，隨即被拍片男叫佢「pick it up（執返佢）」，雖然華人最後都有執返，但過程中疑似扮唔識聽英文，更不斷爆粗狂鬧拍片者「X你老母」、「你好X得閒？」

嗰名紐西蘭網民影到華人亂丟煙頭之後，隨即形容係「disgusting（噁心）」，上前表示希望佢可以執返個煙頭，但嗰個華人就回應「你講乜X嘢？我聽唔明」，表示自己唔識聽英文，更連珠炮發，不斷鬧拍片男「X你老母」。雖然對方係咁鬧，但拍片男一直保持冷靜，不斷要求佢將煙頭丟入垃圾桶，而嗰位華人雖然自稱聽唔明英文，但最後都執返個煙頭，不過就繼續鬧拍片男「你好X得閒？」

拍片男向嗰名華人解釋：「We don't wanna live in a dirty country（冇人想住喺一個污糟嘅國家）」，但嗰位華人好似唔多受落，仲用隔籬商舖嘅玻璃，將支未熄嘅煙頭「捽」熄，更嘲諷冇著鞋嘅拍片男「鞋都冇！X你老母」。最後華人將煙頭丟喺就近嘅垃圾桶，拍片男道謝「Thank you very much」後，就停止拍片。

但原來件事仲有進展，拍片嘅紐西蘭網民補充話，當佢停止攝錄後，個華人就「spoke english too（同時講英文）」，更因為見到拍片男冇著鞋，指着佢隻腳，侮辱佢係「poor guy（窮人）」，而被侮辱嘅拍片男就形容件事好「fascinating（有趣）」。佢又提到，原來喺紐西蘭亂拋垃圾係要罰款100元紐幣（約520元港幣），於同年再犯，就加碼至400元紐幣（約2100元港幣） 。

影片上傳到facebook之後，引來唔少網民回應。因為拍片男喺嗰名華人未將煙頭丟落地之前，已經開始拍片，而佢亦一早坐喺車入面，等拍片男丟煙頭，有外國網民就質疑拍片男意圖「標籤」亞洲人，係「racism（種族主義）」。拍片男則否認有關指控，話勸吸煙者執煙頭，自己一直都有做，只係咁啱今次係華人。佢仲話，以往好多次叫人執返煙頭都冇拍片，結果對方唔單止冇執返，佢仲俾人辱罵，所以當佢見到個華人「going to drop that（準備丟煙頭）」，先拍片施壓，希望佢執返煙頭。

有人就留言，向拍片男解釋「X你老母」嘅意思，拍片男知道意思之後，搞笑回應「My poor mother watched this video（我那可憐嘅母親有睇條片）」，又話其實所有人嘅「共同母親」就係地球，而嗰位華人嘅行為，正正係糟蹋緊自己嘅「母親」。

網民留言
Dicky Chan：X完人咪又要執執垃圾桶⋯⋯做錯事比小小承擔好嗎？
TImothy Lee：識講廣東話唔係真係咁威㗎咋，唔好咁自大啦香港人
Van Li：影X衰晒，佢同香港啲蝗蟲有咩分別？去人哋國家搞搞震
kin ho：有鞋著咁又點？你咪又係扮唔識聽隨地掉煙頭同不停X人老母，仲要扮高尚呀？