超班馬即係超班馬！蘇保羅馬房「健快聯盟」上仗初跑1400米即勝後，今午（22日）沙田日馬爭連捷，續配潘頓角逐第三場四班1400米，結果輕易再下一城，大熱單Win及組合獨贏A1分別派25及14.5元。

4歲新西蘭自購新馬「健快聯盟」前仗服役初出跑谷草1200米得第五，熱身一仗後，上仗初跑1400米一條直路連追逾10駒打開勝門，後勁之強令人側目。今次再戰1400米，續配潘頓負133磅，仍熱到2.5倍，可見台前幕後對牠信心十足。

「健快聯盟」今仗走來亦明顯續有進步，沿途居中，直路潘頓一騎即湧上，完全唔同班，就此贏1.25馬位連捷，亦保持1400米兩戰不敗。

蘇保羅季尾成績不錯，連同今仗「健快聯盟」，馬房季內已獲15Win，只差3場頭馬便達標。

第三場第二至第四名依次為「小福將」、「深愛」及「歡樂小子」。值得一提是雷神騎6檔的「深愛」轉彎及直路飛到外父咁外，蝕位太多，最終影輸給「小福將」撻Ｑ，只得季軍。

---------------------------
星期一至五晚上10點半
《動腦Q》Let's Q the money！
http://bit.ly/2QW8LcI