李八方online︱市民憑畫寄意 冀獄中周庭撐住
蘋果日報 2020/12/23 22:12
周庭黃之鋒
周庭朋友寄咗幅畫像畀周庭，仲用日文同佢打氣。周庭fb圖片
嚟緊幾日就係聖誕節假期，希望大家唔係好忘記喺獄中，同埋喺內地被扣押嘅香港人。話說被重判嘅前香港眾志周庭fb專頁出咗post，提到有朋友寄咗封信畀周庭，準確啲講係幅畫先啱，幅畫就係周庭嘅畫像。周庭fb嘅admin就話，其實每封畀周庭嘅信都係令佢撐落去嘅力量。
周庭fb admin話，周庭喺每次探訪時，都會多謝大家嘅來信同關心，而每封來信都係佢支持落去嘅力量，亦係佢同外面世界嘅連結。周庭亦講到，由還柙轉去監禁，其中一大分別就係更加寂寞、時間過得更慢，而收信就變成佢每日最期待嘅時刻。
黃之鋒打趣話，入獄前有追開《進擊的巨人》，希望大家唔好劇透畀佢。
黃之鋒叫大家唔好劇透《進擊的巨人》
另一位在囚嘅前香港眾志秘書長黃之鋒，佢嘅fb專頁噚日都答謝無論係銀髮族、叔叔、姨姨，抑或小朋友，寫畀佢嘅信，佢仲打趣話，入獄前有追開《進擊的巨人》，希望大家唔好劇透畀佢。
其實寫一封信唔會花太多時間，但係對於所有收到信嘅在囚人士嚟講，都係相當珍貴。假期有時間的話，大家不如寫一封信。
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！