現屆政府中嘅副局長，原來都有位喇沙仔；老闆由蘇錦樑變成邱騰華，商經局陳百里（Bernard）喺梁班子攞咗經驗後，喺娥特坐正時由政治助理升呢做副局長，雖然掌管商務及旅遊等，但佢似乎至愛科研，仲試過同朋友創業，開設生物科技公司。

77年出生嘅Bernard，細個住旺角，家住得寶大廈，小時最鍾意跟住爸爸到麥花臣球場踢波同打籃球。Bernard由細到大都係名校生，幼稚園至中一讀培正，中二考入喇沙，讀完中六後就到美國杜克大學(Duke University)，四年大學仲唔夠喉，加咗五年研究院加一年博士。睇佢呢個履歷，相信估到佢讀書成績係點；而佢做嘞沙仔期間，有入過網球校隊同英文辯論隊。

大學選科時點解揀生物醫學工程和電機工程？佢話爸爸係工程師，所以由細培養咗對電子電路嘅興趣，個人亦對生物醫藥感興趣，加上一直以嚟化學科目成績比較好，聽落都幾順理成章。而喺大學二年級暑假，佢入咗一個著名嘅科研團隊實習，啟發對科研啲興趣，亦決定之後讀博士，希望研發嶄新產品。

回流香港發展後，佢喺一間上市藥廠做過科技總監，其後又同朋友創業，開設生物科技公司，佢話其中一個比較有趣嘅項目係同玩具商合作，將自家研發嘅藥物傳輸技術結合至一種玩具物料，集合玩樂同藥物功能，亦結合咗兩者市場同各自優勢。

搞緊科研又點解從政？佢話大學時會去醫院或社區做義工，體驗社會唔同群體，返港後有次參與社區活動識咗民建聯前立法會議員陳鑑林，其後入咗民建聯，2007年當選觀塘區議員，開啟從政之途。