荷李活型男畢彼特（BradPitt）昨日喺日本宣傳佢主演套新片《戰逆豪情》（Fury），除咗中午記招之外，夜晚佢就去咗有樂町出席該片日本首映，片中拍檔盧根利文（LoganLerman）亦都有一齊去。主辦單位只抽選咗100名幸運影迷到紅地毯旁接近畢佬，其餘粉絲則逼喺旁邊，由於紅地毯喺正百貨公司外面，大批百貨公司嘅客人聽到畢佬到場，就立即湧到出入口處，樓上嘅玻璃窗亦企滿人群，情況都幾混亂，據指有幾名睇熱鬧嘅人被推倒，差啲搞到發生人踩人意外，好彩最後冇人受傷。

大會為避免有意外發生，立即用白布遮掩住畢佬登上嘅台，阻礙路人嘅視線，令到路人散去。雖然一度出現危險，但係老江湖畢佬依然好鬼淡定，不停同幸運粉絲玩自拍，冧爆一眾粉絲。