【韓流】峇里採訪雙宋「愛的鐵證」捱批 節目組公開道歉
宋慧喬峇里宋仲基太陽的後裔
韓國神劇《太陽的後裔》嘅主角宋仲基同宋慧喬因拍劇而傳出撻着,爆出緋聞後兩人已多次否認戀人關係,不過日前二人因為前後腳離開印尼峇里島而再次傳出緋聞(相關新聞連結: http://bit.ly/2s9Rv7q ),雙宋方面亦先後否認同遊峇里,強調事前並不知對方喺峇里,宋仲基方面仲強調同喬妹冇特別嘅關係(相關新聞連結: http://bit.ly/2tIvnDj )。
而日前韓國節目《Section TV演藝通信》就將二人嘅緋聞擺上枱,根據緋聞到當地採訪,仲訪問喬妹下榻嘅酒店,成功採訪酒店員工,對方似有暗示指發現有名男子戴口罩遮樣,退房時才認得對方,不過節目只公開預告,未有透露該人是否宋仲基,完整節目內容於下月2號播出。不過節目此舉已被網民炮轟做法不當,有侵犯藝人私隱之嫌。
至於節目此舉亦惹來峇里酒店方面嘅不滿,指節目拍攝係未經酒店同意嘅違法行為,據知當日節目組未有派人飛到當地採訪,只係另覓當地人士到酒店進行確認,照片亦是當地人以手機拍攝,並冇偷偷潛入酒店拍攝,對方唔係MBC電視台嘅職員,只係普通人。而酒店方面就指當時有自稱係韓國旅行代理公司嘅人嚟到酒店參觀,當時佢哋就借參觀四處拍攝。
由於節目嘅採訪方式受到觀眾批評,節目組今日亦都有喺官網就事件道歉,又指未來會遵守採訪原則同底線,至於嚟緊播出有關雙宋嘅內容,節目組會經修改後再正常播出。
另外,節目組亦都有採用喬妹非公開嘅Instagram賬戶嘅照片,事前亦都冇詢問喬妹方面,喬妹方面指仍未收到節目組有關方面嘅道歉。