因為馬德里體育會今夏被罰唔准買人，射手基沙文有情有義，決定下季留低喺馬體會，唔過檔曼聯。呢個消息一出，好多魔迷感到失望，就連曼聯中場保羅普巴都係咁話，佢仲喺社交網站度話嬲咗基沙文！但相信佢都係講笑啫。

基沙文同普巴一樣係法國國家隊成員，兩個幾老友。基沙文一直心儀踢曼聯，可能同普巴落足嘴頭有關係。不過，基沙文突然轉軚，唔去曼聯，普巴喺社交網站度話嬲嬲。普巴放咗一張佢同基沙文喺國家隊訓練嘅合照上Instagram，張相見到基沙文喺普巴耳邊細細聲講嘢。留言先至係重點，普巴話佢喺「angry mode（憤怒模式）」；各大英媒即刻轉載，話基沙文唔去曼聯，普巴即刻嬲嬲，但傳媒都認為普巴係講吓笑。唔少曼聯球迷喺普巴嘅Ig度留言，叫普巴努力啲，勸番基沙文去曼聯，例如有網民話：「帶佢嚟奧脫福！」