繼公民黨陳家洛上周帶咗四位省鏡千金「吸票」後，經常「B」不離身嘅民主黨涂謹申，噚日帶住信之出席誓師大會，成功吸引全場注意，就連民主之父馬丁李都忍唔住要同信之影相。雖然一班Uncle爭住抱，但信之非常識做，喊都唔喊聲，可能知道參選超級區議員嘅Daddy係主角，唔應該搞亂檔。
涂太阿Sue都有現身，阿Sue近日仲喺書展附近幫老公派傳單，一家大細都為呢場選舉好唔得閒。
喺新界東爭冧莊嘅黃成智亦都帶囝囝黃文軒出席誓師，原來文軒主要幫老竇管理facebook戶口，主打文宣聯絡；黃碧雲就帶埋老公佘雲楚撐場。台上仲有一對夫妻檔，一齊喺新界西參選嘅李永達同陳樹英同時誓師，阿Tree好豪氣話：「我讓你（李永達）！畀你講先！」