股場放大鏡:工業股翻身權智睇勢炒 - 歐陽風
雖然中國大幅調高銀行存款準備金率之後,中國A股仍然企硬,但港股下午越跌越多,尤其內房股更成為重災區。不過跌市之下,工業股卻成功突圍,其中細細隻嘅萬威(167)同品質國際(243)勁升4至5成。
工業股今年以來長跌長有,無論大市升成點都無反應,莫非到港股連反彈都炒完,至嚟追落後?以上兩股曾經係基金愛股,但係股價經過近幾年屢創新低之後,相信已經好少基金揸貨,市值細亦令股價容易炒上。
若然工業股仔翻身,不妨留意今日公佈業績嘅權智國際(601),該公司主攻電子辭典產品,純睇往績,PE僅7.4倍,股息率12厘,不過股價卻由年中的0.67元跌至昨最低0.34元,勁跌近50%。究其原因,集團上月曾發出盈警,指截至9月底止6個月的營業額及盈利可能倒退。
通告稱,盈利倒退原因包括日本成立新公司的投資而產生額外支出、電子消費產品市場持續競爭,令期間產品利潤率下降、放棄生產低增值及利潤之產品,以及新產品未能預期推出市場。權智大舉開拓日本市場,開支當然增加,新產品未能推出市場,最新進度如何,要睇業績怎樣交代。假如權智業績無預期咁差,跌足半年之後應該可以炒反彈,保守啲亦可以等業績同市場反應至入市。
電子消費股若抬頭,可以睇多隻股仔。偉仕控股(856)主要在中國及香港代理電腦零件產品,包括Maxtor、Seagate等大廠硬碟機、AMD底板、手提電腦等相關產品,截至9月底止半年純利1.04億元,按年增長41.3%,每股盈利11.18仙,預測全年PE不足10倍。
該股上月公佈中期業績後即獲麥格理發表報告納入研究,評級為跑贏大市,目標價3.75元,因受惠國內資訊科技產品的增長周期,以及公司經營開支有所下降。由於偉仕成交較疏,只宜長揸不宜短炒。