阿仙奴自從2003/04球季以來一直未再贏到英超冠軍，領隊雲格近年因此飽受批評，「反雲黨」仲成日主張話要踢走佢。不過，雲格帶領阿仙奴嘅成績其實相當穩定，以過去100場聯賽嚟計，阿仙奴嘅成績仲好過摩連奴、高路普同埋普捷天奴，但係就及唔上干地同哥迪奧拿。

根據英國《天空體育》就歐洲五大頂級聯賽領隊做嘅近100場聯賽戰績統計，排喺第1位係現任車路士主帥干地，佢帶隊拎到247分，戰績係79勝10和11負，其次係拎到238分嘅祖雲達斯教練艾基利（75勝13和12負），安察洛堤以236分（74勝14和12負）排第3，第4係231分嘅哥迪奧拿（72勝15和13負）。

至於雲格呢，佢執教近100場聯賽就以197分排第6位，喺214分嘅施蒙尼之後，雖然普捷天奴都係拎到197分，但雲格呢100場戰績係59勝20和21負，普捷天奴就係57勝26和17負，至於摩連奴同高路普就分別以188分同171分排喺第8同第9位。