英國著名男歌手佐治米高（George Michael）聖誕當日猝死，終年53歲，港台DJ梁兆輝被問到佐治米高離世時消息時，佢話：「第一個反應覺得2016年係evil，接近年尾時大家都回顧緊2016，數緊幾多重要音樂人離開咗，去到年尾又有George Michael。尤其是我哋呢個generation嘅music lovers，覺得我哋呢個generation好似過去。明年係我做radio 30年，我個唱盤就算喺唔同直播室，應該冇停過播George Michael，所以話George Michael喺唔同generation都係陪住我哋成長，係記錄我哋成長嘅一把聲音。」

梁兆輝又話：「1985年好重要係佢哋係第一隊西方樂隊去大陸演唱，嗰樣嘢好轟動嘅，值得提番。Wham!扮演角色象徵住大陸首次邁向經濟同改革開放路線，中國大陸選擇讓Wham!成為第一隊西方流行樂隊去演出，明顯話畀外國人知，佢哋有一個新嘅開放改革路線，同埋歡迎西方投資，我覺得係一個好重要嘅里程碑。但我聽聞小插曲，原本佢哋想喺Queen同Wham!之間揀一隊，但佢哋見到Queen嘅形象咁花姿招展咁誇張，佢哋覺得唔係好適合，揀Wham!一隊看上去白人年青人又乾乾淨淨，揀隊安全啲嘅，但原來多年後George Michael都係一個同志。」

講到佢哋音樂對年青人影響，梁兆輝話：「佢哋應該係最早期其中一隊Boy Band，80年代後期又或者90年代，Boy Band係非常之盛行，佢哋開咗先河，80年代初嘅一隊Boy Band。你話佢哋音樂係咪好有內涵好有深度就絕對講唔上，但以pop music去計，我覺得係好常盛嘅流行音樂，主要George Michael真係唱得，當然亦都係佢個人sex appeal啦，佢未出櫃之前吸引到好多少女樂迷，佢喺台上真係好charm嘅。」

講到佐治米高出櫃，梁兆輝話：「George Michael亦都反映咗某一個generation嘅藝人，經歷過公眾人物，因為個人性取向，佢要隱暪，喺出櫃前嘅掙扎，嗰啲心理鬥爭，所以我覺得佢有少少生不逢時囉。以一隊咁流行嘅樂隊同公眾人物，咁多女性歌迷支持嘅時候，佢更加唔敢出櫃，所以一路隱藏咗好耐，去到後期因為發生一啲scandal然後先被迫出櫃，我都覺得其實好遺憾嘅，點解唔可以晨咁早讓自己鬆綁去承認自己性身份呢？咁所以都代表住某一個generation嘅同志公眾人物，佢哋面對嘅挑戰同埋壓力。」