韓國男星李敏鎬最近正趕拍SBS電視台新劇《繼承者們》，而呢套劇都相當揼本，由今個月初起，男女主角李敏鎬同朴信惠等主要演員，齊齊飛到美國取景，更會留喺當地近一個月，拍攝地點包括洛杉磯著名嘅馬里布海灘、荷李活街頭等地。

今日《繼承者們》劇組人員，就率先發放咗第一批喺美國拍攝嘅劇照，該批劇照係於洛杉磯一個杏仁農場取景時拍攝，風景的確十分靚，其中有個鏡頭係李敏鎬同朴信惠喺美景下談天，但係農場灑水系統突然噴水，雖然好似好浪漫咁，但係李敏鎬反而好似俾水淋咁，場面都幾搞笑。