唔好睇曼城球星加比爾捷西斯依家名成利就，查實佢細個家境唔係咁好，自幼就同母親相依為命。加比爾最近分享佢嘅童年經歷，話當年喺巴西踢半職業聯賽嗰時，因為球技太好左扭右扭而得罪人，對方仲威脅「我要打斷你隻腳」，差啲因為咁而收山。

加比爾話佢細細個就喺聖保羅踢半職業聯賽，而對手好多是都係成年人。對於嗰次「死過翻生」嘅經歷，加比爾話：「13歲嗰時，我開始出戰「The Várzea」(半職業聯賽)，同班大人一齊踢波。嗰啲球場好污糟，同埋你會對住班大人，所以非常講求體力。我永遠都唔會忘記，我哋當時對住最勁嗰隊。上半場四分鐘，我扭過佢哋隊嘅『最佳』守衛，然之後一射入網。我記得當時所有人都望住我，好似同緊我講『好!細路，因間我會殺咗你。』」

但件事冇就咁完，之後加比爾控波嗰時就畀人瘋狂攔截，對面隊其中一個隊員仲同佢講「如果你再扭過我，我就會打斷你隻腳」。但加比爾驚都未驚過，再一次喺嗰個隊員面前舞龍，最尾仲搞到對方扭傷足踝。最尾場波踢成2:2收場，而嗰個火爆隊員梗係唔忿氣，仲恐嚇加比爾:「我講過我要打斷你隻腳，我會喺停車場等你。」

之後點樣收科？加比爾話:「佢好認真，當時真係想收我山。好彩班隊友保護我，佢哋全部圍住我唔畀班人接近，仲護送我返屋企。」到上年聖誕加比爾仲踢緊巴甲彭美拉斯，咁啱得咁蹺喺巴西又撞返恐嚇佢嗰個人，到嗰時先知道對方原來係彭美拉斯球迷。話晒事隔咁多年，雙方最終一笑泯恩仇而且一齊合照，至於有冇BBQ就真係唔知喇!

--------------------
狂賀！BFB系列推出5周年，精彩活動為您安排，立即登入速享專屬優惠！ http://bit.ly/2xrTKGM