警方清場越嚟越暴力，唔少人仲被警方拉咗！為免和平示威者喺警署錄口供期間，因為不知就裏亂答問題而被羅織罪名，保障唔到自己嘅權益，社民連特別同學民思潮合作，搵嚟學民女神周庭同長毛粉墨登場，着上制服扮女警嘅周庭，透過同示威者長毛錄口供，逐一揭破盤問陷阱！周庭自爆拍片時狂NG，唔知係咪唔慣做辣手Madam？
喺呢套名為《當周庭拘捕梁國雄》上、下回短片入面，周庭換上制服化身Madam，殺氣騰騰咁向長毛飾演嘅示威者話呀：「𠵱家唔係事必要你講，但你講嘅嘢會成為呈堂證供」，話請佢返嚟係要協助調查；平時勇武嘅長毛，則一改風格飾演腍善茶餐廳員工，對Madam周嘅盤問有問必答！結果就踩中地雷，最終被控好多條罪名！

唔知係咪性格大轉移，長毛表現得唔係太自如，一直對稿讀；周庭亦好明顯盡力扮惡，但嬌滴滴嘅佢，不時都忍唔住笑。八方問過周庭，對親身上陣有咩感受？早前講過呢段時間因為身心俱疲，暫時唔做學民發言人嘅佢，其實唔想受訪多講個人感受，只係透露段片前日拍嘅，自嘲狂NG食螺絲，而佢嘅志願，從來都冇包括做差人，難怪有啲難入戲！
其實周庭捱義氣拍呢段片，無非想溫馨提示因為佔領運動而被捕人嘅人士，錄口供時要提高警覺，包括
一）
唔好同警察吹水、傾偈，因為好易因為閒談而中招；
二）
堅持要打電話畀律師，要求提供協助；
三）
差人畀大家簽任何文件，都要先睇清楚同核對過內容至好簽，最好諮詢律師後先簽；
四）
對於差人盤問，一概可以回應「我冇嘢講」；
五）
簽咗口供或者文件，記住要攞返副本。
想欣賞學民女神嘅演出，可以去YouTube睇睇。上回連結： http://bit.ly/1pqUMb0
下回連結： http://bit.ly/ZL6xCF

李八方
mailto:[email protected]