德國前鋒奴域斯基（Dirk Nowitzki）係少數職業生涯一直只效力一隊波嘅球員之一，佢同小馬嘅關係大家都有眼睇，班主古賓（Mark Cuban）都係有情有義嘅人嚟。事實上，奴域斯基近年唔止一次以友情價同球隊續約，等小馬可以有多啲錢去簽其他球員，加強球隊嘅實力，「德國槍」嘅所作所為，呢日終於得到「回報」喇！

美國傳媒今年7月曾經報道，奴域斯基一而再咁以友情價同小馬續約，生涯大概收少咗1億9,400萬美元。奴域斯基嘅所作所為，其實球迷都有眼睇嘅！「德國槍」禮拜五喺自己Twitter貼咗兩張相，原來一位小馬球迷為咗報答佢之前一直減薪同球隊續約，於是寫咗一封親筆信多謝奴域斯基，封信係咁寫嘅：「過去六年你一直都友情價續約，等小馬有錢簽其他球員，又幫我哋贏總冠軍，呢餐晏我請你食嘅，大隻佬！」，球迷仲真係夾咗20美金喺入面，講得出做得到。雖然呢20蚊同奴域斯基放棄咗嘅果筆錢係無得比，不過正所謂物輕情義重吖嘛，奴域斯基又點會介意呢？