工聯會「煎釀三寶」過去一屆立法會表現不俗，偶爾唔跟中央和諧指示，指出政府不當之處嘅做法更加贏得民心。工聯會四年前推王國興同鄺志堅上位，講到明只可玩一屆，想有得留低要直選，所以兩人各覓出路，新一屆輪到兩位新人葉偉明同潘佩璆頂上。
工聯會會長棠哥噚日親自督師，陪同兩位新丁去報名，王、鄺都有到場打氣，前屆立會代表梁富華亦現身，工聯會議員四代同堂。王、鄺兩人向新丁傳授同政府周旋技巧，王國興叫新丁面對政府要「企硬」，經常暗地「夭」煲呔嘅鄺志堅叫佢哋要夠膽講嘢，唔使怕令政府刺耳，因為工會代表天職係代表勞工界發聲。