無綫2009年《勁歌金曲頒獎典禮》頒亞太區最受歡迎男歌星比林峯，原來陳志雲曾經反對？無綫台慶頒獎禮同台慶竟因為六嬸方逸華一句說話而要分拆？早年港姐選美，原來除咗評判比分之外，重有個「大內密探」暗中提供佳麗操行分畀評判？當年無綫連新聞報導內容編排都要同亞視鬥餐死？曾經効力無綫17年嘅前總經理陳志雲，就今次香港回歸20年電視行業轉變專題，大爆無綫一啲鮮為人知嘅小故事。

每年11月19日係無綫台慶，每年無綫都會喺當晚舉行嘅《萬千星輝賀台慶》，動用全台藝員大肆慶祝，並喺1997年開始喺台慶舉行電視頒獎禮選視帝視后，而喺2006年開始，頒獎禮就分拆出嚟做一個獨立節目。

原來呢個頒獎禮，無綫製作部最初怕得罪人而唔肯做，陳志雲話:「呢個頒獎禮係我做節目部嘅時候提出，不過節目部冇製作節目，唯一製作節目係《K-100》，咁提出呢個構思，初初開會製作部就唔願意去做，話:『唔得架喎，會得罪人㗎喎。』呢個係你約(合約)嗰個唔係你約(合約)，咁你比邊個？後來我話咁好啦，製作部唔做咁《K-100》做啦。《K-100》係一個宣傳本台節目嘅嘢，後來講咗一輪製作部先至願意去做。」

講到點解後來頒獎禮同台慶分拆原因，志雲話:「我記得有次同方逸華小姐開會，方小姐話:『喂，你哋都好唔駛諗嘢喎，你喺《萬千星輝賀台慶》度做埋個頒獎禮，大部份時間都去咗頒獎啦，其他嘅嘢唔需要創作啦！』其中一個原因拆開係因為咁。當然另外亦有商業考慮因素啦，多咗一個大型節目賣比廣告客戶。」

以前台慶不時會有藝人表演高難度動作，但過去10年似乎冇呢啲場面見到。志雲就解釋:「拆開之後《萬千星輝賀台慶》做乜呢？又有啲嘢唔准喎，因為試過有時做啲危險動作真係出咗問題，出咗問題方小姐就比較緊張，佢話:『我哋係咪一定要做一啲咁危險嘅嘢，甚至可能對個藝員演出同事會擔心嘅嘢？如果係咁我哋唔應該做嗰啲啦。』咁又要諗過第啲方向。試過一個原則，保險公司肯受嘅就做啦。重有一個難處，因為TVB要製作嘅劇集真係好多，亦有好多藝員喺劇組，佢唔係淨係做《賀台慶》嗰晚放佢出嚟，個高難度動作重要排o架麻，如果製作嗰邊放唔到人，點排呢？呢個係實際嘅考慮，變咗就盡量唔做嗰啲啦。」

究竟《勁歌金曲頒獎典禮》、港姐或者台慶頒獎禮有冇造馬？志雲話:「香港小姐一定冇造馬，因為有其他評判喺度。o依家基制係點我唔知，但以往個評審團就係佢哋揀，不過，中間Rosa陳紫蓮(前港姐副統籌經理)做超級大保母嘅時候，因為佢同啲參選嘅港姐有一段好長嘅時間排練，佢有啲品行分會提供比啲評判，話比佢哋聽，基於事實基礎，會唔會有遲到佢會講，可能會考慮埋嗰啲，所以有時大家睇點解A君贏C君唔贏，我唔知影響到評判幾多，最終決定都係評判嘅。」

「你話《勁歌》係咪造馬，因為個基制係一個專業評審，可以話係電視台一個選擇，唔係百分百樂迷嘅選擇，如果你話咁樣係一個造馬嘅話，咁咪係囉！但呢個係一個專業選擇，喺嗰個角度、程度嚟講唔係一個造馬。你話大家傾嘅時候有冇拗到面紅耳熱？有嘅，你見到有啲自己心頭好，或者視帝視后頒獎禮都有嘅，大家可以紥到好『行』，好有趣架。」

記得2009年林峯第一次喺《勁歌》攞亞太區最受歡迎男歌星獎，好多網民鬧爆，重有網民取笑林峯亞皆老街至太子道西男歌手o添！原來當日內部開會話畀獎林峯嗰陣，志雲係提出反對。佢話:「嗰次我係唔同意。大家開會，我唔係話林峯唔好，當時我嘅意見提出係我唔認為佢喺嗰一年孭到嗰個獎，我覺得反而對佢唔好o添，但每個人判斷唔一樣，呢個係我當時意見，我未必啱，大家傾o架嘛。」