名氣馬「巴基之星」今季表現不似預期，難免令馬主Kerm Din丁志強感到失望，不過好彩佢另外兩駒夠生性，當中包括生力軍「巴基之友」今季已兩捷，老馬「巴基小子」粗粗哋亦贏過一場。

講起「巴基小子」，丁生話匹馬都已經八歲，現時仲健康，不過唔想將佢跑到傷咗才退役，所以諗住畀佢跑多一、兩場就退役安享晚年。

為此丁生好希望「巴基小子」在退役前，可以再贏頭馬，佢仲話此駒最近狀態幾勇，神態活躍，同年紀完全唔成正比。

「巴基小子」今戰運氣唔差，排到靚仔3檔，加埋告東尼安排有三磅減的潘明輝擒上去，以提升競爭力。

因此今晚（19日）「巴基小子」跑第五場泥地1200米，話唔定又會放冷箭得手。