改編自韓國同名人氣漫畫、由男團ASTRO成員銀優及女星林秀香主演嘅JTBC新劇《我的ID是江南美人》(江南美人)，噚日終於迎來大結局，銀優同林秀香有情人終成眷屬，兩人結尾又咀又攬，即時帶挈收視升至5.753%，創下劇集收視新高，而港劇迷可透過Viu追劇。

噚日《江南美人》播出第16集大結局，劇集講林秀香因為樣貌太醜而受到杯葛，最後決定整容變靚啲，並於大學中重遇同校嘅銀優，兩人之後相戀，承接上集銀優同林秀香上演初吻，林秀香被銀優突然之吻有啲嚇親，衝口而出話：「我哋瞓喇」之後即時解釋係大家各自瞓，十分搞笑。

半夜林秀香媽媽來電，銀優唔想嘈醒林秀香於是接聽咗電話，林秀香媽媽得知愛女拍拖時開心到爆燈，不過林秀香爸爸就嚇銀優話屋企有閉路電視，叫佢乜都唔好做，搞到銀優一整晚都冇覺好瞓。

另一方面，偽女神趙宇麗被一直迷戀自己嘅男同學威脅，男同學更想向佢潑鏹水，當趙宇麗以為自己毀容時即激動得想自殺，好在林秀香及時阻止佢。

最後銀優同林秀香約會，銀優攬實女友欣賞眼前美景，並承諾：「呢度好適合以後嚟求婚，呢度唔會改變亦都唔會消失。我見到父母咁樣，以為自己一輩子都唔會結婚呢。」講講下銀優又錫咗林秀香額頭一啖，林秀香仰起頭等銀優錫自己，之後兩人再情深攬攬同錫錫，結尾二人喺學校着上情侶裝甜蜜拍拖。

另外，噚日《江南美人》台前幕後出席煞科宴，林秀香亦有上載與銀優喺煞科宴上嘅片段。

精選韓流，喺晒《娛果》
http://fb.com/appledailyent