杜汶澤自導自演嘅新戲《空手道》下月2號上畫，今次搵咗鄧麗欣(Stephy)飾演一名中日混血兒。

講起Stephy，其實佢今年仲有一部《藍天白雲》上映，最近仲喺釜山國際電影節上首映，有報道指不少觀眾對Stephy的表演留下深刻印象。今日Stephy接受《蘋果》訪問回應話：「韓國觀眾鍾意好開心，見到佢哋拍咗啲花絮，觀眾睇完嘅評價都幾好，其實今次係好新嘅嘗試。好開心，同埋冇諗過，呢部戲對我嚟講係好新嘅類型，第一次去釜山，我嘅戲好少去到外國地方，畀其他人睇到都有好評價係開心嘅。」

外界有唔少聲音都話Stephy離開咗葉念琛嘅愛情電影，「阿寶」唔再限制佢嘅發展（想知「阿寶」出現咗幾多次？新聞連結： http://bit.ly/2vPsZh9 ），Stephy就話：「其實唔係《藍天白雲》係三年前拍嘅，拍完之後仲拍咗好多愛情片，咁啱呢段時間上映，大家睇到就覺得好似有關係，有樣嘢冇講畀大家聽，我認識張經緯導演，都係葉念琛介紹我識，都係幾得意嘅緣份。」