何超瓊成立嘅天機公關今晚喺上環舉行成立30周年酒會，出席嘅有二房姊妹超鳳、超蕸、超儀、霍啟剛、霍啟山、琦琦及周汶錡等。

超儀就透露20幾年前喺天機做過暑期工，兩個月有1500蚊人工：「係負責度橋，家姐嗰時接咗個四大天王活動，仲有陳百強、關淑怡同彭羚，當時彭羚都係新人，叫咗我哋幾姊妹幫手，為咗藝人唔出汗，又玩吓遊戲，聯絡同安排藝人秘密通道出入，兩邊度橋。當年仲要打去寶麗金搵黎明經理人，同港姐嗰邊，被港姐嗰邊鬧到我一面屁，佢話『即係叫我哋啲女由2點坐到6點，想曬死佢哋。』我聽完咪同大家姐報告，點知又被大家姐『省』我，話係要啲女坐成日，吹咩?佢覺得我唔夠霸氣。」

記者就笑超儀嘅霸氣喺老公陳子聰身上，佢話：「我啲霸氣喺台上，對老公最溫柔。」問到佢有冇興趣做生意，佢就話最好唔好：「迫不得意先開咗間電影公司，自己第一份真正工作係做藝人，自己出去傾嘢都覺得有溝通障礙，有時都會問家姐點算？」講到電影公司會唔會開新戲，超儀就話睇緊劇本：「明年重點係樂隊10周年，有兩個演唱會，未來有東南亞巡唱，同準備緊唱出香港嘅活動。」

更多娛聞，喺晒《娛果》
http://fb.com/appledailyent