啱啱做咗廉政專員兩個月嘅李少光，噚日同班傳媒茶敍。其間講開阿董搵佢做廉署一哥時，李Sir事前並冇收到風，就算佢前老頂葉劉淑儀事前都冇向佢透露過半點風聲。李Sir又話，當時以為阿董見佢係商量居留權同單程證配額問題，點知阿董邀請佢做廉署一哥，並講明呢份工會好辛苦！
本來打算退休嘅李Sir喺考慮咗一陣後，即日就答應咗阿董。佢話考慮嘅時候，完全無同老婆講過，佢老婆係喺政府正式公布前無耐先至知道呢個消息。李Sir解釋，因為呢個係重要嘅政府事務，唔可以同其他人講，就算親如老婆都唔講得。李Sir呢種密密實實嘅作風，唔怪之得受到阿董垂青，邀請佢做廉署一哥啦！
（圖）連老婆都唔講得，李少光都算用心良苦。


傳真︰2623-9278
電郵︰[email protected]