41歲嘅法國名宿查斯古特喺意大利因為醉駕搞到「一身蟻」，呢位前祖雲達斯球星喺意大利都靈唔肯同警方合作，仲喺接受酒精呼氣測試時「爆粗」鬧警察，家陣連個車牌都比人吊銷埋。

根據《太陽報》消息，查斯古特同友人出席完一個品酒會之後，就一齊揸車返去都靈。點知半路就比警察截停咗，仲要佢「吹波仔」，飲完酒仲揸車嘅查斯古特就梗係唔肯。呢位法國名宿唔合作都不特止，仲鬧返警察轉頭：「你呢啲窮人，連2000歐元都賺唔到，你係失敗者！」最後仲問候埋人哋娘親，喺雙方擾攘咗一個鐘頭之後，查斯古特最終都係要「吹波仔」，結果超標咗成3倍。最後畀人罰錢，連個車牌都畀人吊銷咗。

查斯古特喺祖雲達斯效力咗超過10年，仲幫球隊贏過兩次意甲冠軍。他喺2014年掛靴之後，祖記仲畀佢做埋球會大使，暫時唔知呢件事有冇影響到佢個大使之位喇。
--------------------
【每周送10萬】
升級壹會員獨家尊享，立即參加10萬火急大抽獎 !
*推廣生意的競賽牌照號碼：52302-9
--------------------
《體蘋果》陪你睇波講波
https://www.fb.com/appledailysports