出戰今午（3日）日本安田紀念賽、馬主榮智健的「西方快車」原本搵布文操刀，點知布文停賽才換祈普敦，祈普敦機會難逢，立刻決定放棄今日沙田賽事，原有座騎唯有搵人頂上，而潘頓第一時間執咗第三場四班草地1200米，本應由祈普敦角逐的「機智神駒」。

潘頓與「機智神駒」的練馬師麥菲文作為同鄉，麥菲文明知此際潘頓為爭冠軍在在需贏，可以話鬥志百分百，自然樂於起用潘頓。

呢場隻初出馬「好得威」四次試閘潘頓都親力親為並得2冠1亞，但秤過後都諗住跑番上仗得季軍的「好好彩彩」，到祈普敦話要飛日本騎「西方快車」而放棄「機智神駒」，潘頓就算冇操過「機智神駒」，仍即同「好好彩彩」廐主姚本輝講唔好意思。

睇番「機智神駒」呢場雖初出，但試閘慢閘都贏。機智的你，冇理由仲唔知潘頓三揀一係乜意思！