利物浦嘅翼鋒穆罕默德沙拿禮拜六喺紅軍2:1反勝李斯特城嘅聯賽梅開二度，今季英超累積射入17球，雖然仲未追得上熱刺嘅哈利卡尼，但喺射手榜都排緊第2位。不過，睇埋其他數據，大家可能會發現呢位埃及國腳今季嘅表現真係唔簡單。

穆罕默德沙拿今季喺英超上陣21場，但係就直接貢獻咗22個入波（17入球、5助攻）。如果計晒各項賽事嘅話，沙拿今季已經射入23球，比英超八支球隊（水晶宮、般尼、白禮頓、史雲斯、西布朗、哈特斯菲爾德、修咸頓、紐卡素）喺聯賽嘅入波仲要多。

再睇返利物浦隊內嘅數據，穆罕默德沙拿喺今年所有比賽總共射入23球，同包括科拿、費蘭度托利斯在內嘅前利記射手，喺英超年代嘅年度入球榜並列第十位。只係排第十聽落無乜特別，但睇埋比賽場數就知係乜嘢一回事。穆罕默德沙拿只係上陣27場就入23球，比科拿同費托踢少最少十場，因為沙拿係今年8月12日先第一次幫紅軍踢波，所以比賽場數少咁截係好正常，但佢都入咗咁多波，就知道唔簡單喇！

--------------------
BFB CHAMPIONS 2.0 聖誕新年活動連環出擊，登入即送傳奇球星「林伯特」！ http://bit.ly/2xrTKGM