o靚模A.Lin噚日喺銅鑼灣坐港鐵時俾人非禮，有一名中年男子向佢露械，嚇到佢面都青晒，定完驚後，A.Lin即刻上微博揭發猥褻男嘅惡行。
A.Lin噚日黃昏5點幾喺微博留言：「一分鐘前！地下鐵有個男的在我面前露了他下面！！！我的天呀！！發生甚麼事！」其後佢又話：「女生坐地鐵真的要小心！我從來沒想過這事會發生在自己身上，我當時沒有在那幾秒之間把他捉住他也逃跑了。因為真的呆了，如果再見到這種人最好那天我穿了高跟鞋。」

「佢個樣勁開心」

馮仁昭噚日打電話畀A.Lin，佢形容當時千鈞一髮，後悔冇及時捉住賤男，佢話：「我喺銅鑼灣搭車，入咗車廂就坐低，突然有個中年男人企正我前面，佢用報紙遮住下體，忽然揭開露咗下面啲嘢，佢露完見我好驚，就趁車門關上之前走番出去，佢個樣勁開心。我完全感受到佢侵犯咗我，以為呢啲情況日本先發生，點會發生喺香港o架。」A.Lin事後同咗港鐵員工反映，佢好希望港鐵效法日本設立女性專用車廂，以保護女性。
A.Lin事後腦海不停咁浮現露體變態狂惡行，佢越諗越嬲話：「我最衰當時冇着高踭鞋，如果唔係都想兜腳踢死佢。」佢話呢件事令佢對搭港鐵有陰影，暫時都唔敢一個人搭住，或者考慮暫時搭的士出入。