【新增內容及圖片】

韓國電影圈噚日非常熱鬧，當中三部電影喺韓國噚日開畫，包括趙寅成、南柱赫及雪炫嘅215億韓圜(約1.5億港元)大製作《安市城》、玄彬孖孫藝珍主演嘅《談判》及曹承佑同池晟主演嘅《明堂》。

三部電影陣容都好勁，所以喺票房上都爭持得好激烈，當中喺預售方面，原本《明堂》同《安市城》都叮噹馬頭，但到今日公佈嘅票房資料顯示，《安市城》就成功撼贏《明堂》同《談判》成為噚日單日嘅票房冠軍，《安市城》噚日單日引12萬2千7百多名觀眾到場，成功穩坐票房冠軍。而《明堂》就以10萬8千多名觀眾緊隨其後，得單日票房亞軍，至於玄彬首次做奸角嘅《談判》單日只得8萬1千多名觀眾支持，不敵第三位嘅《詭修女》（The Nun），只能排單日票房榜第四位。

另外，趙寅成為咗新片近日頻頻亮相節目做宣傳，喺噚晚播出嘅綜藝節目《黃金漁場-Radio Star》中，佢就大方提到感情觀及結婚。現年37歲嘅佢表示母親有催婚，佢亦好想好似老友車太鉉咁組織幸福家庭，不過對於拍拖對象，趙寅成亦坦言好苦惱：「因為同我拍拖嘅話，會因為我嘅演員、明星身份而感到好辛苦，所以反而冇女生接近我。」趙寅成又稱好鍾意與李光洙、EXO成員D.O.等一班演藝圈好友去旅行，但就笑言光洙唔止身高顯眼，加上鮮艷嘅服飾及戴口罩遮樣，大爆外出旅行嘅話光洙成日畀車太鉉鬧。

精選韓流，喺晒《娛果》
http://fb.com/appledailyent