馮仁昭四圍超:
馬田史高西斯夥畢彼待炮製西式《無間道》 強!

蘋果日報 2004/02/14 00:00


由劉德華、梁朝偉、黃秋生及曾志偉四大影帝合演嘅《無間道》,上年年頭俾美國華納電影公司以一千四百萬港元購入版權重拍,荷李活型男畢彼特(BradPitt),重親口認過會主演同做監製。

咁啱冇戲喺手
噚日英國著名電影雜誌《Empire》報道,五度提名奧斯卡「最佳導演」嘅荷李活名導馬田史高西斯(MartinScorsese),原來喺近日開晒口話好想執導呢套《無間道》嘅荷李活版,今次香港電影真係威到盡。
曾經執導過《狂牛》、《紐約雲風》嘅馬田史高西斯,啱啱完成咗佢手頭上拍咗年幾嘅電影《TheAviator》,現正物色緊新片題材。咁啱佢對《無間道》有興趣,所以好想執導,因為佢𠵱家冇戲喺手,所以佢鍾意幾時開拍《無間道》都可以。《Empire》雜誌亦都話,馬田史高西斯同畢彼特呢對配搭,令人流口水。而傳言之中,畢彼特會做劉德華個角色,唔知梁朝偉個角色,馬田又有乜心水?
小潘潘叫彭丹去死
黃任中去世之後,佢個契女小潘潘日前公開叫彭丹歸還家傳之寶披肩,但彭丹話一早已經還咗,重話有時間都會去台灣送老友最後一程。小潘潘估唔到對方竟然話還咗,明知喪家唔歡迎佢,重話要去送別,小潘潘話:「如果她真的這麼想來,好啊,那叫她直接去天上找黃任中,這樣最快。」咁即係叫佢去死!

Sammi籲情侶浪漫熱吻
鄭秀文(Sammi)擔任水凝持久唇膏代言人,原本噚日要出席嗰個品牌嘅發布會,但因為Sammi哮喘病復發,所以臨時唔去得,不過Sammi仍然呼籲大家情人節記得出席喺時代廣場舉辦嘅活動,Sammi話現場用咗幾千支粉紅色玫瑰花鋪咗個巨型嘅心形布景,佢重呼籲所有情侶記得喺度熱吻,留低個美好回憶。

毛亞敏偕男伴老街觀光
毛亞敏日前同一名中年男子喺上海老街觀光,不過嗰名中年男子發現有人影相時,就即刻向後退,之後重同毛亞敏轉身即刻離開。根據一啲喺嗰區做嘢嘅食店員工表示,毛亞敏嗰日身穿綠色裙,的而且確同一名中年男子一齊。計馮仁昭話,兩個人四圍去旅行都唔係啲乜嘢啫,如果私私縮縮咁俾人影到咪重惹人揣測?
empty
小潘潘
empty
彭丹
資料圖片
empty
Sammi
empty
毛亞敏(箭嘴示)日前同一名中年男子(左)喺上海老街觀光