澳門特首何厚鏵,繼在施政報告之中發出反浮誇口號,搶先掌摑董建華之後,澳門又有新攻勢,就係宣布一連串保舊立新大行動,宣布:進一步保留葡國殖民地領導時期舊建築,保留殖民地四百年美好優質回憶,同時興建澳珠海底隧道,重有漁人碼頭㖭噃!
針對董團夥七年半來種種吹水浮誇嘅幼稚行為,何厚鏵又幾好彩,有一個愚蠢到無倫嘅董班子,隔海俾佢做反面示範單位,總之董班子行東,何厚鏵就行西;董團夥話行左,何厚鏵就行右;董建華搏命吹水,何厚鏵就收聲密食當三番,咁就冇錯!
澳門主權移交五年,何厚鏵同老董對衝住嚟玩,真係大見成效!董團夥及特區土共分子,出於民族自卑心理,對英殖民地時代嘅舊建築,充滿變態仇恨心理,又話要拆除兵頭花園銅像,換一個孫中山像,又要拆甘棠第,又要拆中區警署,以為拆清以前啲舊嘢,就等同佢自己當家作主!