韓國型男鄭雨盛去年被爆被一名姓朴嘅電視劇作家呃咗43億韓圜(約2,967萬港元)，根據韓國傳媒指朴作家喺2009年時以投資拍劇為理由，游說身邊嘅人投資，而鄭雨盛係其中一名受害者。

去年事件曝光後，鄭雨盛就想息事寧人，只表示：「唔想再擴大事件，希望事情盡快落幕。」而今年3月朴作家嘅詐騙案就有結果，首爾中央地檢透露朴作家承認所有控罪，喺一審被判處5年有期徒刑。不過其後朴作家就提出上訴，今日法院將判刑提高，並判處以7年有期待刑，法院指朴作家利用電視劇作家嘅身分及人脈去犯案，並利用唔存在嘅私募股權投資基金去叫受害人投資，短時間內行騙154億韓圜(約1億626萬港元)，令部份受害人受到經濟損失，亦有受害人因而家庭破裂，其犯罪行為極為惡劣。