今年6月初，《蘋果》財經報道，玩具大王蔡志明2008年以近15億元買入的九龍城廣場將售予大陸商人，作價逾50億元。新買家有意購入後經營超市。

大陸搶港地，又一例子。現在才擔心九龍城商場染紅嗎？已經紅了，交易已完成。

蔡志明6月接受本報訪問時承認，透過朋友認識一名大陸買家，對方稱有意購入九龍城廣場：「有位朋友喺大陸做超市，有一日同佢喺九龍城廣場食飯，佢話賣（九龍城廣場）畀佢，我話咁都好喎！」蔡在訪問中亦表現出對該場不作留戀：「賣出機會好大，因為佢好想買，我又諗住，如果朋友要，都好啦！我都搞咗十年八年。」

上月再有傳媒報道披露新買家身份，市場消息指出指項目由大陸買家、富元地產控股高層楊立君、余順輝或相關人士買入。及後蔡志明接受傳媒訪問時確認，已完成九龍城廣場的交易手續，新買家是大陸人，並稱楊立君及余順輝是其中兩名買家，經營房地產及超市等業務。資料顯示，富元地產控股是中山大型民企之一。

今日蔡志明兒子蔡加讚（Karson）同太太汪圓圓到九龍城廣場，出席蔡加怡老公陳漢聰(Jeremy) 投資嘅智能電話應用程式遊戲發布會，同場仲有SuperGirls嘅Jessica、Aka同Yanny等，即場示範。

蔡加讚受訪時，承認九龍城廣場已於上月賣予大陸買家：「係呀，已經完成咗交易，係上個月嘅事。」至於交易金額，蔡加讚表示好滿意：「合理嘅利潤，符合市價，因為經營同投資咗好耐，依家嘅回報覺得合理。」

講到新買家，蔡加讚稱對方在大陸經營商場超市，零售經驗豐富：「所以冇咩好得過買一個商場返嚟擴充，暫時佢應該會維持現狀去營運。」至於日後仲會唔會再投資商場？佢話：「要睇下機會，始終依家樓價地價都係高，而且經營一個商場需要嘅人手較多，同一般住宅或者其他物業好唔同。」

問蔡加怡同Jeremy會唔會俾個女打機？兩人稱有時間都會畀小朋友接觸電子產品，蔡加怡話：「唔會畀佢哋睇得太耐，一般時間控制喺半個鐘頭至40分鐘。」大女依家升K2，蔡加怡話已經有好多功課，所以唔想佢哋太分心。

另外，SG嘅Yanny早前被指同男友行街時因對方唔買錶而黑面，佢今日就解話：「我當時唔係黑面只不過係有啲唔舒服，公司同經理人成日都話我唔笑個樣好似黑面，叫我笑多啲，我日後會留意吓。」至於買錶，佢話：「睇啫，隻錶廿幾萬，都係努力啲工作。」又話自己唔係拜金女，貴重嘢靠自己努力買返嚟會開心過人哋送。

相關新聞：
內地買家50億向蔡志明洽購　九龍城廣場勢染紅
http://bit.ly/2j4C3KA

九龍城廣場染紅 內地超市50億洽購
「玩具大王」賺逾35億
http://bit.ly/2gKbvtL

【商場染紅】九龍城廣場多次改建住宅不果
http://bit.ly/2gP0qLW