電盈（008）建議私有化旗下盈大地產（432），周四復牌，當晚再發出一份通告，擬以5100萬元代價，向盈大收購若干投資物業。5100萬元相比貝沙灣項目只係細數，所以新一份通告實質意義唔大，反而值得關注電盈去年賣盤不成後，未來何去何從？
電盈借殼東燃分拆盈大至今未滿4年，私有化原因，據電盈解釋係自04年控股盈大後，後者股價表現一直落後於恒指和地產分類指數，股價亦較其資產淨值有大幅折讓，私有化將有助盈大專注其地產業務。
此說法並無不妥，但甚麼原因令一家公司長期股價不合理地偏低，莫非真係市場唔識盈大係寶？電盈提出的每股2.85元私有化價格，比盈大停牌前2.26元有溢價26%，但比盈大去年6月底止每股NAV有5.9%折讓，由於本港地產在去年下半年後才真正起飛，據摩根大通去年11月估計，盈大每股NAV至少升至4.47元，私有化作價仍有大幅折讓。
去年，尤其下半年的地產股及地產市道如何，顯而易見，奈何盈大股價卻至多可以用橫行去形容，原因係乜，大概不難估到。集團旗下股票，包括早年由盈拓持有的盈科保險，以及被曲線私有化的SUNDAY，股價表現亦係長期不濟，結果前者賣盤畀富通兼私有化，後者私有化不成，買回資產派息了事。

似為電盈賣盤鋪路

電盈系內股票接連出售及私有化，似乎同一啲集團希望不斷分拆旗下資產上市，製造上市王國的做法剛好背道而馳，有乜啓示？年前電盈賣盤計劃時有傳出，包括由「番薯梁」牽頭做搞手搵投資者買起電盈，結果因被質疑背後資金來源而不了了之。電盈簡化結構，賣盤消息日後估計唔會少。