當年今日
關於我們

窩輪搏擊:正股勢靚中煤輪炒1237 - 俊樺

蘋果日報 2007/09/13 00:00


花旗股市在911事件6周年冇跌仲大升收市,其實都唔係有乜嘢好消息支持,繼續炒減息,係咪減息好快就知,不過美股已經借呢樣嘢炒高咗咁多,係時候要諗吓議息有結果之後個市會點走。
俊樺嘅睇法係,減息1/4厘,花旗股市會插番落嚟,因為好消息已經出咗;減息半厘,個市可以再升多一浸,跟住有獲利回吐;如果唔減息,道指會大插跌番落去試12900甚至12500,至於啲外滙同金價都要睇實,近日美元咁弱,金價升咁多,如果話唔減息,大家都會諗到個後果。
國內個市穩番啲,港股就食住花旗升市個勢炒上,恒指仲創埋新高,拜地產股所賜,炒乜?都係炒減息,仲有就係拖咗好耐嘅西九文娛藝術區嘅計劃終於再諮詢,咁就多個藉口炒,睇啲地產股踢得咁狠,應該未升完。
中煤C輪1237:中煤(1898)昨收15.8元,有壓價嘅手影,但係㩒唔住,周線圖係「破腳穿頭」,今日已經禮拜四,好戲應該喺下個禮拜,呢兩日有機試17元,破位就睇19元,可以買啲C輪1237,昨收62仙,有效槓桿2.1倍,對冲值0.81,正股升上19元,1237應該喺89仙樓上,正股跌穿14.3元止蝕。