人生可以跑到幾多個十年？2014年底仙遊嘅本港馬拉松「長青樹」葉倫明（葉伯），以85歲高齡完成人生最後一個全馬，本地銀行界長跑達人、恒生銀行（011）傳訊及可持續發展總監張樹槐（水哥）就話，會以葉伯為目標，希望有生之年可破到前輩紀錄。
水哥將於今年登六，剛過去星期日，佢去咗越南胡志明市參加馬拉松，完成自己第61個全馬。

盼破葉伯紀錄

曾經講過「跑到100歲都要跑落去」嘅葉伯，係1949年沉沒嘅太平輪倖存者，佢前半生走難，下半生就在賽道上馳騁，85歲高齡於廈門完成最後一場全馬，自2008年因健康轉差而停賽。
水哥話，曾經於澳門與老人家同場跑步，自己都希望有生之年，能以破葉伯紀錄（即係跑到86歲）向其致敬，將來喺天堂再同「長青樹」跑多一轉咁話。
計落條數，水哥即係仲有27年去跑全馬。講番近啲，水哥今年登六，估計都喺賽道上慶生，佢計劃今年參加溫哥華賽事，同第2度出戰紐約全馬呢個全球最具規模嘅馬拉松賽事！
至於早前嘅胡志明市全馬賽事，就喺該市南部第七郡富美興舉行，據聞該市上次舉辦全馬賽事，已經係21年前，是次有500人報名參加全馬，當中300人來自海外。

李華華
mailto:[email protected]